Anis/atis hayyuu miti!!!

Hundumaa kan beeku hayyuudha naseetee

Fallikoo isa harkaa jettee na abdattee

Imimmaan dhalootaa dhiiga faana buustee

Sammuudhaa maraattee qullaayyuu yoo buuste

Anaan hin ilaaliin ani hayyuu miti

Dheebuu sibaasuufis ani hindanda’uuti

Qomookoo dhaga’ii lammii garaa dhabaa

Anis siin alatti humna maalan qaba?

Fala naa barbaada waa beeka na seetee

Narra ija hinkaawwatiin hayyuudha naan jettee

Qubee lakkaa’uunkoo hayyuu nan taasisu

Digirii qabaachuun ana sincaalchisu

Adaraa yaa qomoo, qomoo gaafa xiiqii

Tokkummaa qabaadhuuti yaaddoorraa nahiikii

Lammiikoo jajjabee warreen mataa daabee

Sifuruu dhabukoof anoo baay’een gaabbe

Garaakootti goreen garakoo wallaale

Malee sinjibbineem dhiiroo yaa qaxale

Hayyuun ana mitii hayyuu naan hinjedhiin

Maal hiikni hayyummaakoo rakkookee utuu hinfuriin

Barachuus baradhee qabxii waliin tuulee

Baay’ina digirii walirra tuttuulee

Saayntistiis ta’ee naahaasaarraa qoradhee

Tokko lama jedhee waa hedduu baradhee

Garuu maal hiikkaansaa biyyakoof yoo hintaane

Maaf hayyuu naan jetta fala erga siilaanne

Kutaas lakkaa’eera tokko lama jedhee

Dhoksaa hedduu beekee hubadheera se’e

Kan dubbatu guute dubbiin dhowwaa hinqabu

Iddoo hundaa taa’ee jechaan kan lallabu

Kutee hingatu taanaan beekumsi hiyyummaa

Dubbiin ta’ee hinbeeku safartuu hayyummaa

Qorataa cimaadha rakkoo adda baasee

Toora qaqabsiisee furmaata agarsiisee

Garuu maal godharee gochaanoo duwwaadha

Hojiitti yoo hinjijjiirre maal hiikkaan hayyuudhaa

Saaynsii hawaasaa ta’ees kan uumamaa

Yoo jijjiirama hinfidne maaliin madaalama?

Qomookoo yaa lammii dhaloota akka xiyyaa

Waan iyyuuf wallaalus sammuunkoo na iyya

Yaadee buusee baasee xiinxalee hanga tokko

Guguungumaan deema yoon ta’es kophaakoo

Garuu sigargaaruuf waa tokko nadhibe

Gaara nafuulduraas nan dadhabe dhiibee

Utuun hayyuu ta’ee maaliif naan jiguree?

Maaliif nagidirsa ana dura goree?

Hayyuun isa kamii? isa kami waansaa?

Sabaaf erga hintaanee maalinni hayyummaansaa?

Ardittii kanarraa hammamiif jiraatuu?

Eenyu qoree beeka gaafa lubbuun baatuu?

Akkas erga ta’ee maal hojjedheen darba?

Moo akka bubbeen olii gadi labaa?

Utuun akkas jooruu silaa duuti hin oolu

Ilmaan ilmaankootii anarraa maal dhaaluu?

Egaa yaa Oromoo warreen dhiigakooti

Narraa homaa hin eegiinaa ani hayyuu miti

Hayyuun hayyuu caalu isa sabaaf jooru

Yeroon rafee bulu isa illeen qooru

An gabbataa furdaa inni anaaf deegaa

An yoos hayyuu mitika maalan godhee egaa

Anaaf hinkennamiin maaqumti hayyummaa

Wawuu yaa qomookoo maafan itti himamaa?

Maal raawwadheen fudha maqaa ulfinaa kanaa

Goototaaf naakennaa itti hinwaakkatiinaa

Warreen lammiif jecha du’aaf of kennanii

Aadaaf duudhaa boonsaa nubiraan gahanii

Isaaniif xiqqoodhaa maqaan hayyummaadhaa

Dhaloonni ammaa kun bu’aa isaaniidha

Dhiigni isaanii iyyee lafeensaanii margee

Warreen faffaca’antu isaaniin wal argee

Kanaafan hinbarbaadu ani maqaa guddaa

Isaaniif naa kennaa dabarsaafii hundaa

Hayyuun hayyuu miti yoo sabaaf hintaane

Hayyummaasaa baatee baay’eetu godaane

Kanaafuu dhiigaakoo lammii qaxalettii

Ittiin wal hinwaamiin anis/atis hayyuu miti!!!

*Beekan Gulummaa Irranaa Mardaasaa, 2014